மெய்ப்பொருள் காண்பதறிவு!

இந்தப் படத்தை ஏற்கெனெவே பார்த்திருக்கிறோம்.
இப்போது மறுபடியும் பார்ப்பது, எதிலும் இருக்கிற
நேரெதிர் மறையான இயக்கங்களைப் புரிந்து கொள்வதற்காக!
கறுப்பாக இருக்கும் பகுதியில் காணும் இயல்பில் இருந்து
விடுபட்டு, எப்படி மாறவேண்டும் என்பதைச்சொல்வதற்காக!

சிறு வயதில், நிறைய விஷயங்களில் ஈடுபாடு கொள்ளத் தூண்டுகோலாக இருந்தது படிக்கும் பழக்கம். எல்லாவற்றையும் தெரிந்து கொள்ளவேண்டும் என்ற ஆவலோடு ஒரு குழந்தை 'இது என்ன, இது என்ன' என்று கேட்டுக் கொண்டே இருக்குமே அதுபோல!

அந்த நாட்களில், எங்களுக்குப் படிக்கக் கிடைத்த பொக்கிஷங்களாக இன்றைக்கும் எனக்கு நினைவுக்கு வருவது "கண்ணன்" என்ற பெயரில் திரு.ஆர்வி அவர்களை ஆசிரியராகக் கொண்டு வந்து கொண்டிருந்த இதழ்! அப்புறம் கலைக்கதிர், விளையாட்டு விஷயங்களைத் தெரிந்து கொள்வதற்காக ஹிந்துவும், சுதேசமித்திரனும்!

கண்ணன் இதழில் தொடர்ந்து வெளியாகிக் கொண்டிருந்த Do It Yourself மாடலில் நீங்களே டிரான்சிஸ்டர் ரேடியோ செய்யலாம் என்ற தலைப்பில் வெளியாகிக் கொண்டிருந்த தொடர், அந்த நேரத்தில் எங்களுக்கு மிகப் பெரிய ஆதர்சம், கனவு, செயல்படத் தூண்டுகோலாக இருந்த எல்லாமே! கடவுள் மாதிரி என்று வைத்துக் கொள்வோமே!!

அதைப் படித்து, ஒரு சின்ன ரேடியோ செய்துபார்த்ததில், ஏதோ சந்திரமண்டலத்தில் காலடி எடுத்து வைத்து விட்டது போல ஒரு உவகை, பூரிப்பு இருக்கிறதே அதை வார்த்தைகளில் வடிக்க முடியாது!

அந்தத் தொடரில் குறிப்பிட்டிருந்த சர்க்யூட் பற்றித் தெரிந்து கொள்வதற்காக ஹிக்கின்பாதம்ஸ் சென்னை புத்தகக் கடைக்கு மணி ஆர்டர் அனுப்பி, Electronics For You புத்தகத்தோடு இன்னம் இரண்டு புத்தகங்களையும் கேட்டிருந்ததில் அனுப்பியிருந்த தொகை ஒண்ணரை ரூபாய் கூட இருந்ததால், அதற்கீடாக இன்னொரு புத்தகத்தையும் சேர்த்து அனுப்பியிருந்தார்கள். கேட்காமலேயே வந்து சேர்ந்த அந்தப் புத்தகத்தை, இன்று வரை நான் படித்த புத்தகங்களிலேயே மிக அற்புதமானது என்று நெஞ்சைத் தொட்டுச் சொல்ல முடியும்.

புத்தகத்தின் பெயர்: "அறிவியல் வரலாறு" திரு பெ.நா.அப்புசாமி அவர்கள் மொழிபெயர்ப்பில் இன்றைய விஞ்ஞானத்தின் வரலாற்றை விவரிக்கும் புத்தகம், ஆங்கில மூலத்தை இன்னும் தேடிக் கொண்டிருக்கிறேன், எனக்குத்தெரிந்த சிறுவர்களுக்குப் பரிசளிப்பதற்காக.

நூல் இப்படித் தொடங்குகிறது:

மிகப் பிரபலமானதும் பழமையானதுமான நூலகம் அது. பல நூற்றாண்டுகளாக அரும்பாடுபட்டு சேகரித்த நூல்கள், களிமண் பலகை அச்சு வடிவத்தில், ஆயிரம் ஆயிரம் இருந்த நூலகம். முஸ்லீம் படையெடுப்பிற்கு ஆளான நேரம், நூலகக் காப்பாளர், முஸ்லீம் தளபதியின் காலில் விழுந்து மன்றாடிக் கொண்டிருக்கிறார்.

"இங்கே இருப்பவை மனித சமுதாயத்தின் அறிவுக் களஞ்சியம், அரிஸ்டாட்டில் முதலான கிரேக்க தத்துவ ஞானிகள் முதலாக, நம்முடைய முன்னோர்கள் சொல்லிவைத்தவை அனைத்துமே இருக்கிறது..வைத்திய முறைகள், இன்னும் எத்தனையோ துறைகளைப் பற்றிய அரிய செய்திகள் எல்லாம் இங்கே அரும்பாடு பட்டு, பாதுகாத்து வைத்திருக்கிறோம். இவற்றைக் காப்பாற்றித் தர வேண்டும்."

வெறும் மத நம்பிக்கையிலான மூர்க்கத்தைத் தவிர வேறொன்றையும் அறிந்திராத, அந்தத் தளபதி உறுமினான்:

"மனிதன் தெரிந்து கொள்ள வேண்டிய அனைத்தும் குர் ஆனிலேயே இருக்கிறது. குர் ஆனில் இருப்பது தான், இதிலேயும் இருக்கிறதென்றால், இவை தேவையில்லை. குர் ஆனில் இருப்பதற்கு மாறாக இவை இருக்குமேயானால், இவை அழிக்கப் படவேண்டியவை."

அப்புறம் என்ன, நூலகம் தரைமட்டமாக்கப் பட்டது.

ஒரு மூர்க்கனின் அறிவின்மையால், நம்முடைய முன்னோர்கள் தேடி வைத்திருந்த எத்தனையோ அறிவுச் சுரங்கங்கள் பயனில்லாமல் போனது என்று நூலாசிரியர் நொந்துகொண்டே, மேற்கே மதம் என்பது எப்படி அறிவியலை முடமாக்கி வைத்திருந்தது, கொடுமைகளுக்கு ஆளாக்கியது என்பதை விவரிக்க ஆரம்பிப்பார்.

பல நூற்றாண்டுகள் இப்படி மதத்திடம் சிக்கிச் சீரழிந்து கொண்டிருந்த அறிவியல், எப்படி கடந்த முன்னூற்றைம்பதே ஆண்டுகளில் அணையை உடைத்துக் கொண்டு வெளியேறிய நீரைப் போல பொங்கிப் பிரவகிக்க ஆரம்பித்தது என்பதை மிக சுவாரசியமாக, கலீலியோவை அவருடைய கண்டுபிடிப்புக்கள் தவறு என்று ஒப்புக்கொள்ளுமாறு வலியுறுத்தி நடந்த விசாரணை, ஆலிவர் கிராம்வெல் ஆங்கில அரசுக்கு எதிராகத் தொடங்கிய மக்கள் போராட்டம், பாவ மன்னிப்புச் சீட்டை எதிர்த்து மார்ட்டின் லூதர் நடத்திய எதிர்ப்பு இயக்கத்தால் திருச்சபை இரண்டாகப் பிரிதல் இப்படி தேக்கிவைத்திருந்த மதச் சுவர் ஓட்டைவிழுந்து, உடைப்பெடுத்து, இரண்டாயிரம் வருடங்கள் தேங்கியிருந்த நிலையை மாற்றுகிற வேகத்துடன் அறிவியல், பல கிளைகளாகப் பிரிந்து, வளர்ச்சி அடைந்திருப்பதை, இந்தப் புத்தகம் மிக எளிமையான விதத்தில் சொன்னதைப் படித்து, அறிவியல் ஈடுபாட்டை வளர்த்துக் கொண்ட அனுபவம் இருக்கிறது.

இந்த அனுபவம், ஒரு விஞ்ஞானப் பார்வையை மட்டுமல்ல, எந்த ஒரு விஷயத்தையும் முழுமையாகப் புரிந்துகொள்ளவேண்டும் என்கிற பண்பையும் வளர்த்து வந்திருக்கிறது.

சமீப காலங்களில், நாத்திகத்தை உரக்கக் கூவும் புத்தகங்கள், மேற்கே நிறைய வந்து கொண்டிருக்கின்றன. அதுவும் குறிப்பாக, 2001 செப்டம்பர் 11 ஆம் தேதியன்று,நியூ யார்க் நகரத்தின் இரட்டைக் கோபுரங்கள் மீது ஒசாமா பின் லேடன் நடத்திய தாக்குதலுக்குப் பின்னால், இந்த மாதிரி மூட்டைப் பூச்சிக்குப் பயந்து வீட்டையே கொளுத்துகிற கதையாக, தொடர் நிகழ்வுகளாகிக் கொண்டிருப்பது தான் பரிதாபத்திலும் பெரிய பரிதாபம்!
நான் அறிவியலுக்கு எதிரானவன் இல்லை. மத அடிப்படைவாதியும் இல்லை. மதத்தின் பெயரால், அல்லது மதத்தை எதிர்ப்பது என்ற பெயரால், எதையும் அழித்துப் போட வேண்டும் என்கிற தீவீரவாதியும் இல்லை. இந்தப் புரிதல்களோடு,ரிச்சர்ட் டாகின்ஸ் எழுதியிருக்கும் புத்தகத்தைக் கொஞ்சம் பார்ப்போமா?
புனித அக்வினா என்ற கத்தோலிக்கத் துறவியின் கடவுள் இருப்பதை உறுதி செய்யும் ஐந்து வழிகளை எடுத்துக் கொண்டு, அதை மறுக்கும் விதத்திலேயே புத்தகம் ஆரம்பிக்கிறது. அக்வினா தனது வாதத்தில், கடவுள் இருப்பதை, எதெல்லாம் அல்லது எதில் எல்லாம் கடவுள் இல்லை என்ற எதிர்மறைக் கேள்வியை அடிப்படையாகக் கொண்டு, இப்படி ஒரு முறை அனேகமாக எல்லோருமே அறிந்தது தான், இப்படிச் சொல்கிறார்:

# God is simple, without composition of parts, such as body and soul, or matter and form.

# God is perfect, lacking nothing. That is, God is distinguished from other beings on account of God's complete actuality.

# God is infinite. That is, God is not finite in the ways that created beings are physically, intellectually, and emotionally limited. This infinity is to be distinguished from infinity of size and infinity of number.

# God is immutable, incapable of change on the levels of God's essence and character.

# God is one, without diversification within God's self. The unity of God is such that God's essence is the same as God's existence.

டாகின்ஸ்கொஞ்சம் பொறுமை இழந்த நிலையிலேயே அக்வினாவின் இந்த வாதங்களை நிராகரிக்க ஆரம்பிக்கிறார்.அதே வேகத்தில், நம்பிக்கையின் அடிப்படையில் எழுந்த பிரமாணங்களை முற்றிலும் நிராகரிக்கிறார்.
அடுத்து, பிரார்த்தனைகள் பலிப்பதில்லை, என்று ஒரு சோதனை முடிவை எடுத்து வைக்கிறார். 
 
தனிப்பட்ட அனுபவங்களை முட்டாள்தனமானவை, வெற்று ஆவேசம் என்று தீர்ப்பெழுதி விடுகிறார்.
 
புனிதர் ஆன்ஸ்லெம் என்ற கத்தோலிக்கத் துறவியின் இருப்பைப்பற்றியதான சிந்தனைகளின் [ontological arguments, from St.Anslem, contained in Meditations and Prayers] மீது தன்னுடைய வாதங்களைத்தொடர்கிறார்.
கடைசியாக, சாத்தியமே இல்லை[Improbability] என்ற தர்க்க அடிப்படையில் விவாதத்தை முன்வைக்கிறார்.

இந்தப் புத்தகத்தில் அப்படி என்ன தான் இருக்கிறது, என்ன விஷயத்தைத் தான் அப்படிப் புதிய கண்டுபிடிப்பாகச் சொல்லி விட்டார் என்று பார்த்தால், ஒரே வார்த்தையில், ஒன்றுமே புதிது இல்லை. வேண்டுமானால், இங்கே தெருமுனையில் கூட்டம் போட்டு, "ஏ பாவிகளே, மனம் திரும்புங்கள்!" என்று பிரசாரம் செய்வதைப் போல, "கடவுள் என்று ஒன்று இல்லை, அதனால் நீங்கள் நிம்மதியாகவும் சந்தோஷமாகவும் இருக்கலாம்!" என்று ஆறுதல் சொல்வது வேண்டுமானால், கொஞ்சம் வித்தியாசமாக இருக்கலாம்!

யாருக்கு?

நிச்சயமாக நம்பிக்கையுள்ளவர்களுக்குச் சொன்ன மாதிரி இல்லை.
இவரைப் போல நம்பாதவர்களுக்குச் சொல்லப் பட்டதேறுதல் வார்த்தைகள் மாதிரித் தான் இருக்கிறது!
 
மாதிரி என்று கூட இல்லை, இந்த வரிகளில் அப்பட்டமாகவே அதையும் பார்க்கலாம்:"As I said in the Preface, American atheists far outnumber religious Jews, yet the Jewish lobby is notoriously one of the most formidably influential in Washington. What might American atheists achieve if they organized themselves properly?"

1927 ஆம் ஆண்டு பெர்ட்ராண்ட் ரஸ்ஸல் என்ற அறிஞர், 1927 ஆம் ஆண்டு மார்ச் மாதம் 6 ஆம் தேதி லண்டனில் நிகழ்த்திய ஒரு சொற்பொழிவு. நான் ஏன் ஒரு கிறித்தவன் அல்ல என்ற தலைப்பில், அதே வருடம் துண்டுப் பிரசுரங்களாகவும் வெளியிடப்பட்டது, பின்னால் அதே தலைப்பில் வேறு சில கட்டுரைகளையும், சொற்பொழிவுகளையும் சேர்த்து ஒரே தொகுப்பாக 1957 ஆம் ஆண்டு பால் எட்வர்ட்ஸ் என்பவர் வெளிஇட்ட பதிப்பு "Why I am not a Christian and other essays" பிரபலமானது. முதலில் சொன்ன சொற்பொழிவு, துண்டுப் பிரசுர வடிவில் வெறும் பதின்மூன்றே பக்கங்களில், இணையத்தில் வெகு எளிதாகத் தரவிறக்கம் செய்துகொள்ள முடியும், இதில் சொல்லியிருக்கும் அதே விஷயங்களைத் தான் டாகின்சும், ஏறத்தாழ நானூறு பக்கங்களில் சொல்லியிருக்கிறார்.

அதனால் என்ன, ஒரே விஷயத்தை எத்தனை தடவை சொன்னால் என்ன என்கிறீர்களா?

அங்கே தான் விஷயமே இருக்கிறது.

ஏற்கெனெவே திரு ஜெயமோகனின் 'வெறுப்புடன் உரையாடுதல்' என்ற கட்டுரையை முந்தைய பதிவொன்றில் தொட்டுச் சொன்னதைத் தான் இதற்குப் பதிலாகச் சொல்ல முடியும். ஏற்கெனெவே முடிவெடுத்துக் கொண்டு, அதன் பேரில் வாதங்களை அடுக்குகிற ஒரு அணுகுமுறை, எப்படி உண்மையைக் காண முடியும்?

'Alice in the Wonderland' புத்தகத்தைப் படித்தவர்களுக்கு அநேகமாகத் தெரிந்திருக்கும். கதாநாயகி ஒரு பூனையைத் தொடர்ந்து ஒரு விசித்திர உலகிற்குள் பிரவேசிக்கும் போது சந்திக்கும் அனுவவங்களைச் சொல்லும் போது செடியைத் தலைகீழாக நட்டு ஆராய்ச்சி செய்யும் விஞ்ஞானிகளைக் கிண்டல் செய்கிற மாதிரி ஒரு பகுதி வரும்.

அன்றைய மதவாதிகளுக்கு, அறிவியலைக் கண்டால் அவ்வளவு இளப்பமும், கேலியும் இருந்தது உண்மை. அதே மாதிரித் தான், இந்த நவீன விஞ்ஞானிகளும், மத நம்பிக்கைகளை, மூடத்தனத்தைச் சாடுகிறேன் என்ற பெயரில், புத்தகங்களை எழுதிக் குவித்து வருகிறார்கள்.

"எனக்கு தெரிந்த அறிவியலில், மதம், ஆன்மீகவாதிகள், கடவுள் இப்படி ஏதாவது தெரிந்தால், அப்பொழுதும் இவை தேவை இல்லை. எனக்குத் தெரிந்த அறிவியலில், இதெல்லாம் காண முடியாவிட்டால் அப்போது கூட இவை எனக்குத் தேவை இல்லை" என்கிற மாதிரி வரும் இந்தப் போக்கை ஏற்கெனெவே எங்கேயோ பார்த்த மாதிரி இல்லை?!

முதலில் பார்த்தோமே, மூர்க்கத்தனமாக, நூலகத்தைத் தரைமட்டமாக்கிய ஒரு முட்டாளின் கதை, அதே போலத் தான், இவர்களும் கூச்சலிட்டுக் கொண்டிருக்கிறார்கள்.

கூச்சல் அனைத்துமே உண்மையாக இருப்பது இல்லை.

மதங்களை நியாயப் படுத்தவோ, அவைகளில் குறையே இல்லை என்றோ சொல்லவில்லை. முந்தைய பதிவொன்றில், மதங்களின் தேவை முடிந்து விட்டது என்ற ஸ்ரீ அரவிந்த அன்னையின் கருத்தை ஒட்டியே சொல்வதாகவும் குறிப்பிட்டிருந்தேன். ஸ்ரீ அன்னை சொல்கிறார்:

“Why do men cling to a religion?


Religions are based on creeds which are spiritual experiences brought down to a level where they become more easy to grasp, but at the cost of their integral purity and truth.

The time of religions is over.


We have entered the age of universal spirituality, of spiritual experience in its initial purity.”
 

-quoted from Words of The Mother, Part II First Edition 1989 pp.88

"எப்பொருள் யார்யார்வாய்க் கேட்பினும் அப்பொருள்
மெய்ப்பொருள் காண்ப தறிவு"

-குறள்423: அறிவுடமை.


"This truth is hidden from the rationalist because he is supported by two constant articles of faith, first that his own reason is right and the reason of others who differ from him is wrong, and secondly that whatever may be the present deficiencies of the human intellect, the collective human reason will eventually arrive at purity and be able to found human thoughts and life securely on a clear rational basis entirely satisfying to the intelligence." 

ஏற்கெனெவே இட்ட பதிவுதான் -இங்கே இதை விரிவாகப் படிக்கலாம், இங்கே மெய்ப்பொருளைத் தேடும் முயற்சியில் எப்படி உதவுகிறது என்பதையும் பார்க்கலாம்!

மெய்ப்பொருள் எது, மெய்ப்பொருளைக் காணும் அறிவு எது என்பதைத் தொடர்ந்து பேசுவோம்.



No comments:

Post a Comment

ஏதோ சொல்லணும் போல இருக்கா? அப்ப சொல்லிட வேண்டியது தானே! என்ன தயக்கம்? அனானிகள், தங்களை அடையாளம் காட்டக் கொள்ளத் தயங்குகிறவர்கள், (Profile இல் தங்களைப் பற்றி சிறு அறிமுகம் கூட செய்யத் தயங்குபவர்கள்) பார்த்து விட்டு ஒதுங்கிக் கொள்வது நலம்!அப்படிப்பட்டவர்களுடைய பின்னூட்டங்களை இங்கே ஏற்பதற்கில்லை! மன்னிக்கவும்!